LE CHARIVARI

LE CHARIVARI

Histoire villageoise en patois Vaudois.

L’ai y avai dein noutra coumena na véva, qu’avai à nom Pernetta, et que passave lè trei vingt et di : n’y a pas tant grand tein, car mé que ne su pas bein villio, m’ein sovigno coumein çe l’etai de l’autro hy : sta véva addon avai dja einterra dou z’hommo ; mà cudive adé cin trova eincora ïon, et reluquave ti lé valet, lè djouveno, lè villio, lè bi, lè pouët ; l’ai ire tot on, medai que pusse accrotzy son fou. Tsin que va ti lé djor à la tsassa trauve à la fin oqué ; se bein que noutra chouma fe tant que reincontra son bourriscô. Coumein l’avai boun’adrai d’écu’ et dei bon boccon dé terre sein dévalè, l’einnortza on pouro rafouën, qu’étai tot écouëssi, et que gn’avai pas pire on n’an, qu’étai frou dei z’écoulé ; on lei desai Cliodo : stu couer étai tan à la bounna, que ne cognessai ran de ran au train de stu mondo ; ne savai pas pire sé motchy sé mimo, ne distingua la balla man de l’otra. Le matin dau djor que s’épusarant noutr’anchanna se ve d’obliedjai de lai lava lo mor, pé la mau que l’ire to botzchar, et de lai bouëtta on fe rodjo au paudjo ; sein qué n’arai bounnamein pas su yo étai sa draita. Lo menistre lé maria coumein les otro, mà de ne sein lo mein dé trei yadjo que fut d’obliedja de dere dau mau ei fémallé que recaffavant per lo motthi.

Quand lo selau fe mussi, ti lé valets de la coumena coumeinçaron à lau fair’on Tserrivari : l’etian mè de chinquanta ; djamai n’ai ran oyu dé paret : l’avaiant dé gros toupein coûmeiu portan lè vatzé que poyant ei montagné, dei battioré que bracquan lo tzenévo et de puchein verét dé bou : trainavan su lé perré na disanna dé koumaclio qu’avian étatzi au bet le’ z’on dé z’otro. L’ai y en avai que t’appotavan avoué dei martalé su dei cassoton et dei bernar, to parei qu’on fa quand les avellie djittan, au bein que sounnavan avoué dei couernè de tservi : c’en baillivé n’a via de la metzance, et on trafi de l’autre mondo : on arai djera, que lo maffi, lé vaudai et tolé lé Tsautzevillé dau pahy, ley tegnivan lau gran sabbat. L’avin eincora aimpliai na bossétta de krouyoz’ eintzapplié, de villia ferrailla, et d’autra bourtià coc en, et la rebattavan dû la deléza dau for, kan k’au borni d’avô. Chat t au houe dé leur menavan avoué dei djigué désaccouerdaié et avoué dei trouyé : et pouai dei sublié dè magnin per dessu lo to. Lé cou dé pistolé et dé fusi allavan dru coumein dein na rehiüva. Ein dou mot, cen vo fasai na chetta de la malavia, que vo n’aria pa oyu le ballé chotzé dé noutra Dama, et que ti les tza dau bor se couilliran ne se yo, et de ne sen l’on qu’on reve de quoque djor. Ver la miné ti stau détertin se reduisiran tzi leur, ein lutseiyein, to parei que se l’avian fai na boun’achon, et cudiran alla se dremi. Mà se l’avian bein eincotzy, n’avian pas to fornei, et l’affaire étai trau bein eimmordjaie, por ein resta iquié, Na Dama que restave dein na maison to proutzo fu tan épouairia, que l’accutza avan termo, et que fu tolamein troblaye on par de tein, qu’on craiyai que l’avai lé z’einnemi : et on pouro boubo de quatr’an qu’étai sailliai sur la porta, ein pre lo grou mo, et du lor tzesai d’apremi quasu toté lé né, à pau pri à la mîm’haura.

Bon, stop ! Assez pour démontrer que peu de mes lecteurs peuvent lire et comprendre l’histoire, mais assez pour illustrer aussi que le patois est langue de la terre.

gtell, le conservateur suisse 1815